奇怪習慣
星期六上班的心通常都不在工作上，事實上，我相信大部份人除了星期一最不願意上班，其次便會是星期六。在我出來工作後，便經常抱怨星期六早上要上班，我只試過一份工作有長短週 (長週星期六返半天)，從來未做過五天的工作，因此便經常問︰「邊撚個發明星期六要返半日﹖」有說是因為遷就銀行辦公時間，一些支票的來往等等都會留在週末早上去做。不過我的工作與這些無關，那又為甚麼全人類都要星期六上班呢﹖
其實除此之外，香港人一向都有一些不知從何而來的習慣，但大家又會乖乖遵守。
1. 掃球
「掃球」是指一些運動項目打「友誼波」前的熱身，打籃球的朋友應該十分清楚。小時候到街場「鬥波」總要掃兩球，雙方「鬥波」前不計分射入兩球當熱身，然後才正式計分。但熱身不應該是分隊前已經熱好了嗎﹖既然要掃球，為甚麼是兩球而不是三球呢﹖
其實打乒乓球都有這個習慣，幸好踢足球不需要，否則可能夠鐘都未掃完。
2. 埋齋
有始當然有終，鬥完波臨走前各人都會拿著籃球射入「埋齋」。「掃球」可以說是熱身，但埋齋的原因就更加不明白，有誰可以解答我呢﹖
3. 通電話叫「喂」
香港人大部份接電話和打出電話第一句都會說︰「喂」作為開場 (P.S. 我是說大部份人，不是說全部，別和我拗你第一句是講 Hello)。西人聽電話會說「Hello」或者「xx (自己名字) speaking」，但「喂」與「Hello」又有何關係呢﹖
所以曾經在讀大學的時候，看見來電是熟朋友打來，我已經會用「講野﹗」來取代「喂」，又或是在之前加上一些稱呼和助語詞，例如︰「仆街講野﹗」或是「屌你講野﹗」
4. 叫「食飯」
小時候到祖父母家吃飯通常都「東華」般多親戚。習慣是吃飯前，後輩會叫「阿爺食飯、阿女麻食飯…(下刪一眾長輩稱呼)」。每一位後輩說完又會到另一個，如是者這個程序足足用上幾分鐘…
不過隨著眾兄弟姊妹已經長大成人，這個習慣已經不必了。到人家裡作膳，通常只會一起說句︰「大家食飯﹗」，簡單快捷。
posted by 小碧 @ 12:39
4 Comments:
1. 籃球我就唔知，不過乒乓球其實就真係有咁既需要。因為一般人平常反應時間大約係0.2至0.4秒，但係打乒乓球所要求既反應時間就要快o的，咁掃球就正好俾身體去作出調正去適應之後的比賽。
2. 埋齋其實係咪同lucky 有關呢？即係今次有埋齌，下次打波就有波入果的咁。
3. 自從有"雷電顯示"以來，我已經有好耐唔講「喂」喇。不過你話「喂」同「Hello」有咩分別，我會話，前者多係廣東人用，後者多係西人用囉。至於用途呢，我覺得係俾對方知道電話接通o左，你可以開始講o野咁囉。
4. 如果依家我再有機會同我阿媽果便o的親戚食飯，我一定會同我外婆講「仆街食飯﹗」。
1 同2 答你唔到~~ 因為我唔打波的~~
3 的話... 見到o的唔識o既電話~~ 我會講「hello」... 至於識o個o的~~ 一開波可能係「點呀」~~ 或者係「乜料」~~ 幾時會變o左西人~~ depends on 我認唔認得個來電~~
4 呢... 我屋企係冇呢個rule 的~~ 埋位就可以開始咬飯~~ 如果係出街食的話~~ 可能會係一齊係咁嗌「食飯食飯食飯食飯...」~~
我屋企都唔會叫人食飯，即使係細個時都唔會，不過通常去人屋企食飯，even 係熟朋友都會循例講聲「食飯」。
我uni有人一聽電話就「屌你…點呀?」
我有時都會咁...不過係絕少人先會咁...
發佈留言
<< Home